ni prodigalkid
Pinilit ko ulit ipkit ang aking mata pagkatapos ko maalimpungatan. Buong linggo rin akong puyat sa paggawa ng website kaya inutusan ko na ang aking katawan na magpahinga. Kaya kahit nakakatakot yung panaginip na gumising sakin, di ko na to ininda pa.
Ilang sandaling pagpihit-piht sa kama, bigla na kong nilunod ng mga alala. Nakaraang di naman ganon katagal ngunit tinaob agad ang dumaang bangungot kani-kanina lang. Kumurot ito sa akin kahit humihilom na sugat na ang pangyayari. Gusto kong di pansinin ang di imbitadong pagpasok niya sa isip ko dahil wala na rin naman siyang puwang pa sa puso ko, kaso may mapait na lasa talaga siyang iniwan sa aking pagkatao kaya hinayaan ko na lang mag-reminisce ang aking utak. Naisip ko rin kase baka pwedeng madala ko to sa panaginip, at dun sigurado mababawasan naman ang katangahan ko.
Anyway di gumana kaya bumangon na lang ako at naisipang manuod ng “anime”, pero nainip rin ako hanggang sa magawi ako dito. Sa totoo lang matagal na rin ako sa PSE pero kumbaga sa basketbol masaya na akong nakaupo lang sa bangko. Naiba lang ngayon ang ihip ng hangin at sinipag akong itry magsulat .,.-masisisi ko yun sa mga nakasabit na puso sa lobby kanina. PS. Jollibee kasalanan mo rin to.
Marami-rami na rin dumaang pag-ibig sa buhay ko pagkatapos niya, isa lang talaga siya sa mga special dahil ika nga nila, sa buhay raw ng tao may tatlong klase ng pag-ibig na darating sayo. Una ay yung kahit uhugin ka pa at may gatas pa sa labi e lumalandi ka na, yun ang puppy love. Nakakatuwa man ikwento senyo to ngayon dahil sa mga “unang karanasan” ko dito e sa susunod na lang siguro dahil ang kwento ito ay para sa true love kong si *b****. Pero sige tawagin na lang natin siyang Abby.
Si abby, bata pa lang kami maganda na talaga siya. Medyo chubby pa siya siguro noon pero ngayon akalain mo naging talent na siya ng star magic.Anyway, Ahead ako ng dalawang taon sa kanya ngunit pareho kase kaming nasa honor list kaya madalas nagkakaroon kami ng chance magmeet. Gusto gusto ko yung ngiti nya dahil may dimple siya sa left cheek at may guhit siya sa chin. Kaya nung dumating ako ng grade 6 napansin ko agad na nawala na siya.
Sa di ko pa alam na dahilan noon ay lumipat na siya ng paaralan mula sa isang pribadong catholic school sa isang probinsya, papunta sa isang public school na okay lang naman, kaso dahil nga sa probinsya lang kami ay mapapansin mo talaga na naliligaw siya doon. Sobrang puti rin kase ng kutis ni Abby at kung may quality nga na hindi mo malilimutan sa kanya e yun na siguro yung kagandahan nya.
Lumipas na nga yung mga taon na hindi na kami nagkita hanggang sa kasamaang palad e pinauwi na ko ng nanay ko mula sa maynila. Binagsak ko kase lahat ng subjects ko sa unang semester ko ng kolehiyo sa isang school sa intramuros. Nilipat ako sa isang sikat na school sa kalapit na bayan mula samin. Kung doon raw ako at least mababantayan na ako ng nanay ko dahil makakauwi raw ako every weekend.
Naging okay naman yung transition ng buhay ko from promising future engineer to tambay. Nag-adapt naman ako ng mabilis. Fit-in agad sa bagong career ko and nakakajam ko na ulit yung mga malalapit kong kaibigan ditto sa aming probinsya, kahit every weekend nga lang. Si jake, Yung bestfriend ko ng highschool na nabalita pa sa radyo ang di ko inaasahan magdadala sakin sa laro ng tadhana. Sinundo nya ako isang sabado sa tambayan naming para magpasama sa paaralan ng gf nya noon. Susunduin nya raw ito ngayon dahil monthsary nila. Natural naman tumanggi ako dahil hindi ko naman gusto maging 3rd wheel sa kanila. Pero pinilit nya ako dahil marami raw kasing umaaligid sa girlfriend nya. Si jake ang bestfriend kong lampa ay sinamahan ko na. Muntik na rin kasi siyang di makagraduate dahil nasaksak siya ilang buwan bago matapos ang taon.
Dumating na nga kami sa tapat ng school ng girlfriend nya. Pumasok na siya sa gate para hanapin sa classroom yung girlfriend niya, at ako naman ay nagpaiwan na lang sa may tindahan sa tapat ng gate para magyosi. Totoo naman hinala niya dahil kahit ang ingay sa lugar na iyon mula sa mga nagppractice na mga marching bands sa hapon e mapapansin mo pa rin ang init ng tingin ng mga nagsisilabasang mga highschool na kabataan sa akin. Di ko naman sila pinansin kase medyo sanay naman ako sa away at lamang naman ako sa kanila noon sa edad, kahit isang taon nga lang. Pero siguro marami rin lumalabas na mga bes noon sa paligid at natuwa na ako sa kamamasid.
Tumigil na ang mga tambol at pauwi na halos lahat ng estudyante. Nakita ko na rin palabas ng gate si jake kasama ang girlfriend niya. At nung malapit na sila at natatanaw ko na, duon na bumilis ang mabagal na takbo ng buhay ko. Nasa harap ko na ulit si abby.